دواین هه‌واڵ

هه‌رێمه‌ کوردیـیه‌کان - Voice of America

چاوپێکه‌وتن

لە هەزارەی سێیەمدا هەنگاوەكان بە ئاراستەی سیستەمی مرۆڤسالارین و هەر بزافێك لە بەرامبەر ئەو سیستەمەدا بوەستێت، شكست دەهێنێت، بێگومان كاتێك هەردوو چەمكی (پیاوسالاری و ژنسالاری)یش دەخرێتە نێو خانەی (مرۆڤ سالاری)یەوە، ئەوا بۆ نەهێشتنی جیاوازییەكان و دەستەبەركردنی یەكسانی رەگەزی، بەتایبەتی لە وڵاتانی نەریتیدا ئافرەتان نیازیان بە رێنەسانسێك هەیە. هەر لەو بارەیەوە بەشداربووانی ئەم راپۆرتەی گۆڤاری گوڵان راو سەرنجی خۆیان لەو بارەیەوە دەخەنەڕوو.

 

گوڵان: كۆمەڵایەتی

 

 

«لە پێش هەموو شتێكدا بۆ چەسپاندنی یەكسانیی رەگەزی پێویستە لە كلێشەی مافەكانی مرۆڤدا بە شوێنیدا بگەڕێین و بە هەردوو رەگەزەوە لە دژی جیاوازی رەگەزی خەبات بكەین، هەر ئەوەش كرۆكیی بەختەوەری و ئاسوودەیی هەر كۆمەڵگەیەكە». ئەوە دەستپێكی قسەكانی (هێڤی جۆڵا) بوو. ئەو خاتوونە وەك كەسایەتییەكی ئەكادیمی و یاساناس باسی ئەوە دەكات كە سەقامگیری و بەرزبوونەی ئاستی ئابووری و بەرجەستەكردنی شارستانییەتی هەر كۆمەڵگەیەك پەیوەستە بە هاوبەشی پێكردنی هەردوو رەگەزەوە، بۆ ئەوش بە پێویستی دەزانێت (دەسەڵاتی تەشریعی) بە دانانی یاسا كۆسپەكانی بەردەم یەكسانی رەگەزی تێكبشكێنێت و دەسەڵاتی تەنفیزی لە جێبەجێكردنی سڵ نەكاتەوە و دەسەڵاتی چوارەمیش وەك میدیا بە چڕی چاودێری بكات و لەو بوارەدا زانیاری تەواو بە تاكی كۆمەڵگە بدات و هوشیاری بكاتەوە». گوتیشی: «ئەگەر پیاوان لەكۆمەڵگەی ئێمەدا هۆشیار بوونایە و بڕوایان بە مافی مرۆڤ بووایە، دەبوو ئێستا كۆمەڵگەیەكی زۆر تەندروست و دوور لە توندوتیژی خێزانی و دوور لە كوشتنی ئافرەتمان هەبووایە».

 

رۆڵی ئەرێنیی ئافرەت لە گەشەی هەر كۆمەڵگەیەكدا شتێكی سەلمێندراوە و لە هەر كۆمەڵگەیەكی مۆدێڕنیش جێپەنجەی ئافرەتانی كارامە دیارە، بەڵام لە زۆر وڵاتی دواكەوتوودا بە كوردستانیشەوە، نەك بایەخێكی ئەوتۆ بە توانا و كارامەیی ئافرەت نەدراوە، بگرە نەریتسالاری لە سەردەستی پیاوان وایكردووە، تەنانەت رێگری لە بیركردنەوەی ئافرەت بكات، ئافرەتێك كە بیرمەندن بە «بەشە زیندووەكەی كۆمەڵگە» پێناسەیان كردووە، ئەوەندەیان كۆسپ و تەگەرە لە بەردەمیدا سازكردووە، كە نەتوانێت بە ئاسانی لە گشت جومگەكانی كۆمەڵگەدا بەشدار بێت. ئەوەش بە مانەوە لە بازنەی دواكەوتووییدا هەژمار دەكرێ، كە زیانی زۆری بە گەشەكردنی كۆمەڵگە گەیاندووە.

 

ئالان لەشكری توێژەری كۆمەڵایەتییە و سەبارەت بە هەمان پرس دەڵێت: «هەر كاتێك ئافرەت لە هەر كۆمەڵگەیەكدا لە دەسەڵاتدا جێگەی بۆ كراوەتەوە، رۆڵی زۆر باشی بینیوە و ئەو كۆمەڵگەیە كەشێكی ئارامتری بە خۆیەوە بینیوە، لە هەرێمی كوردستانیش بە هەوڵی ئافرەتانی هۆشیار یاسای توندوتیژی دەركرا و یاسای باری كەسی هەموار كرایەوە، بەڵام ئەوە كۆتایی هەموو شت نییە و ژنانی كورد بۆ گەیشتن بە مافەكانیان و نەهێشتنی جیاوازە رەگەزییەكان خەباتێكی دوور و درێژیان لە پێشە و خۆیان دەبێت بە پشتیوانی یەكتر بزاڤێك رێكبخەن، تا بە پیاوانی كۆمەڵگەی خۆمانی بسەلمێنن كە هیچیان لەوان كەمتر نییە و تەنانەت لە بڕیاری سیاسیشدا دەتوانن رۆڵی كاریگەریان هەبێت».

ئەندازیار چیا حەسەن سەرەتا باسی ئەوە دەكات كە «هیچ سیستەمێكی نێرسالاری و نەریتسالاری بە فەلسەفەی حوكمڕانی بە یەكسانی رەگەزی پابەند نابێت، ئافرەتانی ئێمەش گیرۆدەی ئەو سیستەمەن كە هەتا ئێستا كۆت و بەندی كردوون و بە دەگمەن لەچوارچێوەی دیوارەكانی ماڵەوە دەردەچن و كەمتر تێكەڵ بە چالاكییە مەدەنی و سیاسییەكان دەبن».گوتیشی: «پێویستە هەوڵی جددی بدرێ بۆ ئەوەی سیاسەتی هەرێمی كوردستانیش بەرەو مرۆڤسالاری هەنگاو بنێت و ئەو سیاسەتەش بەرپرسیارە لە هۆشیاركردنەوەی تاكەكانی كۆمەڵگە بۆ نەهێشتنی جیاوازی رەگەزی».

 

زۆربەی بیرمەندان و چالاكانی بواری مافی مرۆڤ جگە لە هەوڵەكانیان بۆ نەهێشتنی جیاوازی رەگەزی، ئاوڕێكی بەرچاویش لە تایبەتمەندییەكانی ئافرەتان دەدەنەوەو بە پێویستی دەزانن گۆڕەپانی سیاسی و كۆمەڵایەتی بۆ كاراكردنی خانمان هەموار بكرێت. زۆر توانای ئەرێنی لە كارەكتەری ئافرەتدا خۆی حەشار داوە كە پێویستە ئەو كارامەییانە ئەكتیڤ بكرێن. بەشداری ئافرەتیش لە كایەی سیاسی و كۆمەڵایەتی هۆكارێكە بۆ پەروەردەكردنی نەوەیەكی هۆشیار و جیهانیش ئەوەی تاقیكردۆتەوە و سەلمێندراوە كە ئەو ئافرەتانەی لە پۆستە باڵاكاندا كاردەكەن، وێنەیەكی جوانیان لە دەسەڵات پێشكەش كردووە و تەنانەت زیاتر لە پیاوان توانیویانە لە كێشەكان تێبگەن و چارەسەری بكەن.

 

سالار ئەحمەد وەك میدیاكارێك رایوایە: «پرسی مافی مرۆڤ بەگشتی و ئافرەتان بەتایبەتی لە كۆمەڵگەی ئێمەدا گۆڕانكاری زۆری بەسەرداهاتووە، بەڵام ئەو هەنگاوانەی كە بمانكاتە كۆمەڵگەیەكی پێشكەوتوو، زۆر سستن». جەختیش لەوە دەكاتەوە كە «پێویستە لە تێڕوانینی كۆمەڵگەدا بەرامبەر بە ئافرەت ریفۆرم بكرێ»، گوتیشی: «ئافرەتان بۆ دەستەبەری یەكسانیی رەگەزی نیازیان بە رێنەسانسێك هەیە و پێویستە پڕۆگرامەكانی خوێندنیش لە هەرێمی كوردستان بە ئاراستەی پێگەیاندنی كەسایەتی و برەودان بە تواناكان و پەروەردەكردن و فێركردن و هاندانی بەشداری زیاتری ئافرەت لە سیاسەتدا گۆڕانكارییان تێدا بكرێت». هێمای بۆ ئەوەش كرد كە لە ساڵی 1995 لە كۆنگرەی پەكین جەخت لەسەر ئەوە كرایەوە بەشداری ئافرەت لە سیاسەت و بڕیاردروستكردن و بڕیارداندا زیاتر بكرێت، لە وڵاتانی رۆژهەڵاتی وەك هیندستان و پاكستان و سریلانكا ئافرەتی سەرۆك وەزیرانیان هەبووە، كەچی لە زۆر وڵاتی عەرەبی ئافرەتان تەنانەت مافی دەنگدانیشیان نەبووە. سەبارەت بە رۆڵی رێكخراوەكانی تایبەت بە ئافرەتیش لە هەرێمی كوردستان گوتی: «بەداخەوە زۆربەی ئەو دەزگایانەی كە تایبەتن بەپرسی ئافرەتان كارێكی بەرچاویان بۆ پێگەیاندنی ئافرەت نەكردووە، نەشیانتوانیوە تاكی كۆمەڵگە وا رابهێنن كە زیاتر لە چەمكی رەگەزی، بایەخ بە چەمكی مرۆڤبوون بدەن».

 

سەرچاوە: ماڵپەرى گولان میدیا

http://www.gulan-media.com/sorani/details.php?section=4&id=27752

 

 

K24- هه‌ولێر:

ئه‌مڕۆ په‌رله‌مانی ئه‌وروپا له‌ ستراسبۆرگ  خه‌ڵاتی(ساخارۆڤ) ی به‌خشییه‌  هه‌ر دوو كچه‌ ئێزدی نادیه‌ موراد و له‌میعه‌ به‌شار.

سه‌ره‌تا سەرۆکی پەرلەمانی ئەوروپا (مارتن شولتز) وتارێكی پێشكه‌شكرد و به‌ڕێزه‌وه‌ ئاماژه‌ی به‌و دوو كچه‌ ئێزدییه‌دا كه‌ بوونه‌ته‌ ره‌مزی قوربانی و نه‌هامه‌تی ئێزدییه‌كان و رایگه‌یاند" نادیه‌ و له‌مییعه‌ئه‌وه‌مان بیرده‌هێننه‌وه‌ كه‌چ به‌رپرسیارییه‌تییه‌كمان له‌سه‌ر شانه‌، جیهان ده‌بێت پاڵپشتی له‌ گه‌له‌كه‌ی تۆ و له‌ تۆش بكات.

هه‌روه‌ها گووتی:تا ئێستا كه‌س له‌سه‌ر كۆمه‌ڵكوژی ئێزدییه‌كان دادگایی نه‌كراوون و پێویسته‌ ئه‌و كه‌یسه‌ ره‌وانه‌ی دادگای تاوانی نێوده‌وڵه‌تی بكات و شانازییه‌ بۆ ئێمه‌ وه‌ك په‌رله‌مانی ئه‌وروپا خه‌ڵاتی ساڵی 2016 ی ساخارۆڤتان پێده‌به‌خشین.

دواتر له‌میعه‌ به‌شار كه‌ یه‌كێك بوو له‌و كچه‌ ئێزدییانه‌ی خه‌ڵاتی ساخارۆڤی پێبه‌خشرا. له‌ به‌رده‌م ئاماده‌بوواندا چیرۆكی نه‌هامه‌تی خۆی و خێزانه‌كه‌ی گێڕایه‌وه‌ كه‌ به‌ده‌ست داعه‌شه‌وه‌ دووچاری كاره‌سات بوون و ئاماژه‌ی به‌وه‌كرد كه‌ ئه‌و ماوه‌یه‌ی له‌ ژێر ده‌سه‌ڵاتی داعشدا بووه‌ 4 جار له‌ لایه‌ن چه‌كدارانی داعشه‌وه‌ كڕین و فرۆشتنی پێوه‌كراوه‌ و دواجار چه‌كدارێكی داعش كه‌ به‌ڕێوه‌به‌ری نه‌خۆشخانه‌ی قه‌زای حه‌ویجه‌ بووه‌ كڕیوویه‌تی.

هه‌روه‌ها باسی له‌و مه‌رگه‌ ساتانه‌ی ئێزدییه‌كان كرد له‌ ژێر ده‌ستی داعشدا و داوای له‌ ئه‌وروپا و جیهان كرد هاوكاری ئێزدییه‌كانبن بۆ ئه‌وه‌ی دووچاری نه‌هامه‌تی هاوشێوه‌ نه‌بنه‌وه‌.

 

له‌میعه‌ به‌شار خاوه‌نی خه‌ڵاتی ساخارۆفی په‌رله‌مانی ئه‌وروپا

دواتر نادیه‌ موراد كه‌ به‌ هه‌مان شێوه‌ خه‌ڵاتی ساخارۆڤی پێبه‌خشراو پێشتریش له‌ لایه‌ن نه‌ته‌وه‌ یه‌كگرتووه‌كانه‌وه‌ كرابووه‌ باڵیۆزی نیازپاكی، له‌ به‌رده‌م ئاماده‌بوواندا وتارێكی پێشكه‌شكرد و ئه‌و رۆژه‌ شوومانه‌ی هێنایه‌وه‌ بیری ئاماده‌بووان كه‌ به‌هۆی داگیركاری و زوڵم و سته‌می داعشه‌وه‌ به‌سه‌ر ئێزدییه‌كاندا هات.

له‌ قسه‌كانیدا باسی نه‌هامه‌تی خانه‌واده‌كه‌ی كرد كه‌ چه‌ند ئه‌ندامێكی خێزانه‌كه‌ی و دایكی بوونه‌ته‌ قوربانی ده‌ستی چه‌كدارانی داعش و له‌وێوه‌ داوای له‌ یه‌كێتی ئه‌وروپا و جیهان كرد، یان كار بۆ هاوكاری و پاراستنی ئێزدییه‌كان بكه‌ن به‌ جددی، یان ده‌رگا بكه‌نه‌وه‌ تاوه‌كو ئێزدییه‌كانیش وه‌ك كۆڕه‌وی جوله‌كه‌كان پاش كاره‌ساتی هۆلۆكۆست ناوچه‌كانیان جێبهێڵن و خۆیان بگه‌یه‌ننه‌ ئه‌وروپا و ناوچه‌ ئارامه‌كانی جیهان.

نادیه‌ موراد خاوه‌نی خه‌ڵاتی ساخارۆفی په‌رله‌مانی ئه‌وروپا

دواتر له‌ لایه‌ن سه‌رۆكی په‌رله‌مانی یه‌كێتی ئه‌وروپاوه‌ خه‌ڵاته‌كه‌ درایه‌ هه‌ر دوو كچه‌ ئێزدییه‌كه‌ و له‌ كۆتایی رێوره‌سمه‌كه‌دا برایه‌كی له‌میعه‌ به‌شاری به‌ ئاماده‌بووان ناساند كه‌ ماوه‌یه‌كی زۆر له‌ كه‌مپه‌كان ژیاوه‌ و دوای نه‌هامه‌تییه‌كی زۆر و ژێرده‌سته‌یی داعش توانراوه‌ له‌ رێگه‌ی په‌رله‌مانی یه‌كێتی ئه‌وروپاوه‌ ده‌رفه‌تی گه‌یشتنی به‌ ئه‌وروپا و شادبوونه‌وه‌ی به‌ خوشكه‌كه‌ی بۆ بڕه‌خسێنن.

سه‌رۆكی په‌رله‌مانی ئه‌وروپا له‌كاتی راگه‌یاندنی شادبوونه‌وه‌ی براكه‌ی له‌میعه‌ به‌شار به‌ خوشكه‌كه‌ی پاش به‌خشینی خه‌ڵاته‌كه‌ به‌ هه‌ر دوو كچه‌ ئێزدییه‌كه‌

رۆژى 27ى تشرينى يه‌كه‌م/ ئۆكۆتۆبه‌رى 2016، پەرلەمانی ئەوروپا هەردوو خاتوو (نادیە موراد و لەمیعە بەشار)ی وەک براوی خەڵاتی ساخارۆڤی پەرلەمانی ئەوروپا دیاریکرد. خەڵاتی ساخارۆڤ بۆ ئازادی ڕادەربڕین لە پاش خەڵاتی نۆبڵ بۆ ئاشتی، بە دووم خەڵاتی گرنگ لە بواری مافی مرۆڤ و ئازادییەکاندا دادەنرێت.

له‌میعه‌ به‌شار به‌ هه‌مان شێوه‌ی نادیه‌ موراد رزگار بوویه‌كی دیكه‌ی ده‌ست داعشه‌ و دوای چه‌ند جارێك هه‌وڵدان سه‌ره‌نجام له‌ گه‌ڵ دوو كچی دیكه‌دا خۆیان له‌ ده‌ست چه‌كدارانی داعش رزگار كرد،به‌ڵام له‌ رێگه‌ی ده‌ربازبوونیان بۆمبێكیان پێدا ته‌قییه‌وه‌ و سه‌ره‌نجام زێنێكی زۆر به‌ر لامیا كه‌وت و هه‌ر دوو كچه‌ هاوڕێكه‌شی گیانیان له‌ ده‌ستدا.

ساڵانه‌ ئه‌و خه‌ڵاته‌ ده‌درێته‌ چه‌ند كه‌سێك و له‌ لایه‌ن لیژنه‌ی كاروباری په‌ره‌پێدان و ده‌ره‌وه‌ی په‌رله‌مانی ئه‌وروپاوه‌ ناوه‌كان بۆ بردنه‌وه‌ی خه‌ڵاته‌كه‌ ده‌نێردرێت بۆ سه‌رۆكایه‌تی په‌رله‌مانی یه‌كێتی ئه‌وروپا.خه‌ڵاته‌كه‌ به‌هایه‌كی مادیشی هه‌یه‌ كه‌ بڕه‌كه‌ی "50" هه‌زار ئیرۆیه‌  و به‌ ناوی زانای ئه‌تۆمی"ئه‌ندێری ساخارۆڤ" كراوه‌‌ كه‌ هه‌موو ژیانی بۆ داكۆكیكردن له‌ مافه‌كانی مرۆڤ ته‌رخانكردبوو له‌ ناو یه‌كێتی سۆڤیه‌تی پێشوودا.

خه‌ڵاته‌كه‌ به‌ هاوبه‌شی دراوه‌ته‌ "4" كه‌س كه‌ به‌لای لیژنه‌كانی په‌رله‌مانی یه‌كێتی ئه‌وروپاوه‌ به‌ شایسته‌ ناوبراون و دوو له‌و كه‌سانه‌ش ئه‌و كچه‌ ئێزدیانه‌ بوون و هه‌روه‌ها رۆژنامه‌وانێكی تورك و رۆژنامه‌وانێكی ناوچه‌ی كریم له‌ ئۆكرانیا پێكه‌وه‌ خه‌ڵاته‌كه‌یان بردووه‌ته‌وه‌. 

 

سەرچاوە:

www.kurdistan24.net/so/news/1953e550-8ed5-4e46-b6b2-e7a7dc6c1cd2/په‌رله‌مانی-ئه‌وروپا-خه‌ڵاتی-ساخارۆڤی-به‌خشییه‌-دوو-كچی-ئێزدی

 
 

سوید، ئیدریس ئیبراهیم گه‌ڵاڵه‌یی تایبه‌ت به‌ كوردستانی نوێ

 

نادیه‌ موراد گه‌یشته‌ سوید. نادیه‌، ئه‌و كچه‌ بیست‌و یه‌ك ساڵه‌یه‌، كه‌ راستییه‌كانی داعش-ی سه‌باره‌ت به‌ كاره‌ نامرۆڤایه‌تییه‌كانیان به‌ گوێی جیهاندا ده‌دات.

 

دۆزه‌خێك بۆ مرۆڤایه‌تی

نادیه‌؛ له‌لایه‌ن وه‌زیری ده‌ره‌وه‌ی سوید مارگۆت والسترۆم‌و به‌هاوكاریی رێكخراوی (هه‌رگیز فاتمه‌و پێلا له‌بیرناكه‌ین) بانگهێشتكراوه‌. رۆژنامه‌یه‌كی سوید نابینین كه‌ بابه‌تێكی له‌سه‌ر نه‌نووسیبێت، بۆیه‌ واز له‌ سه‌رچاوه‌كان دێنم‌و گوڵبژێری قسه‌ به‌ئازاره‌كانی ده‌كه‌م، كه‌ بوونه‌ته‌ مانشێتی رۆژنامه‌كان. رۆژنامه‌نووسێك باس له‌ ئێزدییه‌كان ده‌كات‌و ده‌ڵێت: ماڵباتی نادیه‌ كوردن‌و خۆیان به‌ ئێزدی ده‌زانن، ئه‌و ئایینه‌ی كه‌ زۆر له‌ پێش ئیسلام بوونی هه‌یه‌و خه‌ڵكه‌كه‌ی داب‌ونه‌ریتی تایبه‌تیان هه‌یه‌، زۆربه‌یان له‌ كوردستانی باشوور ده‌ژین. كچه‌ فریشته‌یه‌كی ئێزدی هه‌گبه‌ی ئازاری له‌كۆڵناوه‌، ده‌رگا به‌ده‌رگا وه‌ك پیرو مشاخه‌كانی ئێزدی ئۆقره‌ناگرێت، به‌ڵام باس له‌ هزره‌كانی كتێبـی (جلوه‌و مه‌سحه‌فا ره‌ش) ناكات، تا هه‌وادارانی ئایینه‌كه‌ی زۆرتربن، به‌ڵكو باسی ئه‌و نه‌هامه‌تیانه‌ ده‌كات كه‌ داعش له‌به‌ره‌به‌یانێكی ساڵی 2014دا له‌ژێر دروشمی (الله‌ اكبر) دۆزه‌خێك بۆ مرۆڤایه‌تی ده‌كه‌نه‌وه‌و هه‌رچی منداڵ‌و پیرو ژن هه‌یه‌ ده‌یانكه‌ن به‌كه‌نیزه‌و سه‌با، ئه‌وانه‌ی مه‌رجه‌كانی ئاره‌زووه‌ هه‌وه‌سبازه‌ تۆقێنه‌ره‌كانی ئه‌وانیان تێدانییه‌ وه‌ك به‌رخه‌كه‌ی حه‌زره‌تی ئیبراهیم سه‌ریان ده‌بڕن. ئه‌و له‌جیاتی نوێژی پاڕانه‌وه‌ی هه‌ڵهاتنی خۆرو نیوه‌ڕۆ خۆرئاوابوون، باسی ئه‌و خۆرانه‌ ده‌كات كه‌ له‌ ژێر قامچی‌و شیری داعش له‌ كونجه‌كانی موسڵ توندكراون‌و رۆژانه‌ جه‌سته‌كانیان ده‌كه‌وێته‌به‌ر نه‌فره‌تی ئاڵا هه‌ڵگرانی داعش. ئه‌و باسی ئه‌و سێ مانگه‌ی خۆی ده‌كات كه‌ چۆن جه‌سته‌ی بۆته‌ كاڵای سه‌ربازه‌كانی داعش‌و وه‌ك بوكه‌ڵه‌یه‌كی منداڵان وازیی پێكراوه‌. ئه‌و داوای ئه‌وه‌ ده‌كات ئه‌و كچ‌و ژنانه‌ی تائێستا له‌به‌رده‌ستی داعشن به‌هانایانه‌وه‌ بچن‌و ده‌ربازیان بكه‌ن له‌ هه‌وه‌سبازه‌كان.

 

وه‌ك گه‌ڕیده‌یه‌ك 

له‌ جیهاندا ده‌خولێمه‌وه‌

رۆژنامه‌نووسێك ده‌ڵێت من له‌ چاوی ئه‌وم ده‌خوێنده‌وه‌ كه‌ خه‌ڵاتی نۆبڵ چه‌ند بایه‌خداره‌، به‌ڵام به‌وشه‌یه‌كیش باسی لێوه‌نه‌كرد، له‌بری ئه‌وه‌ وتی: ئه‌وه‌ی به‌لای منه‌وه‌ گرنگه‌ ئازادكردنی ئه‌وانی تره‌و گه‌ڕانه‌وه‌یانه‌ بۆ ژیان، رووی قسه‌كانم له‌ هه‌موو حكومه‌ت‌و مرۆڤدۆسته‌كانی جیهانه‌ تا سه‌ربه‌ستی به‌وان ببه‌خشنه‌وه‌. ئه‌و مه‌سحه‌فی ره‌شی له‌هه‌گبه‌دا نییه‌ تا باسی دروستبوونی جیهان‌و ئاده‌م‌و حه‌وا بكات، به‌ڵكو ده‌ڵێت؛ من هیچ كارێكم به‌ژیانی خۆم نییه‌، بێجگه‌ له‌وه‌ی وه‌ك گه‌ڕیده‌یه‌ك له‌ جیهاندا بخولێمه‌وه‌و باسی ئازاره‌كان بكه‌م، تاهه‌موومان پێكه‌وه‌ بتوانین ئه‌وانی تر ئازادبكه‌ین، من ته‌نیا بۆ ئه‌وه‌ ده‌ژیم.

 

له‌ مردن خراپترم به‌سه‌رهاتووه‌

نادیه‌ وا باس له‌ شه‌وی یه‌كه‌می ده‌كات؛ سه‌رۆكی ده‌سته‌كه‌، دامیه‌به‌ر شه‌ق‌و قیژاندی به‌سه‌رمداو ناچاریكردم جله‌كانم فڕێبده‌م، ئه‌و منی به‌ڕووتی فڕێدایه‌ ژوورێكی پڕ له‌ پاسه‌وان، ئه‌وان ده‌ستدرێژییان كرده‌سه‌رم تابورامه‌وه‌. ئه‌و داوای ئه‌وه‌ی ده‌كرد ببم به‌ئیسلام‌و ببم به‌ژنی ئه‌و، به‌ڵام من ئه‌وه‌م ره‌تكرده‌وه‌، من پێموتن بێنوێژم، به‌ڵام ئه‌وان گوێیان به‌م شتانه‌ نه‌ده‌دا، ئه‌وان وتیان: ئێوه‌ له‌ ئه‌مڕۆوه‌ كۆیله‌ی ئێمه‌ن، ئێمه‌ له‌ڕاستیدا كۆیله‌ی جنسی ئه‌وان بووین، ئه‌وان هه‌رگیز وه‌ك مرۆڤ سه‌یری ئێمه‌یان نه‌ده‌كرد، له‌ناو پاسه‌كه‌ پێیانوتین له‌به‌رئه‌وه‌ی ئێوه‌ ئیسلام نین، ئێمه‌ به‌مافی خۆمانی ده‌زانین هه‌رچی له‌ گه‌ڵتان بكه‌ین‌و بتانكه‌ین به‌سه‌باو كۆیله‌ی خۆمان. براكانم‌و دایكم‌و به‌سه‌دان گه‌نج‌و خورتی تر تیاچوون، منیش چه‌ندینجار له‌سه‌ر لێواری له‌ناوچوون گه‌ڕاومه‌ته‌وه‌، ژیانی من له‌ مردن ناخۆشتربوو، بۆیه‌ من ناترسم، چونكه‌ من له‌ مردن خراپترم به‌سه‌رهاتووه‌. له‌ چه‌ندین ده‌رگامدا له‌ موسڵ تا له‌ كۆتاییدا ماڵێكی میهره‌بان له‌ ده‌ستی ئه‌و دڕنده‌ به‌ناو ئیماندارانه‌ رزگاریانكردم.

له‌و رۆژه‌وه‌ نادیه‌؛ وڵات به‌وڵات، ئه‌وروپاو ئه‌مریكا‌و ئاسیا ده‌گه‌ڕێت‌و باسی رۆژه‌ ره‌شه‌كانی ژیانی خۆی ده‌كات، ئه‌و رۆژانه‌ی مرۆڤه‌ غه‌زه‌بگرتووه‌كانی داعش ته‌واوی مرۆڤایه‌تی له‌ ده‌ستده‌ده‌ن. ئێستا نادیه‌ موراد، كه‌ هه‌ڵگری ناوی ئیسلامییه‌و كۆیله‌ی ئه‌وانیش بووه‌، له‌ لیستی ئه‌وانه‌یه‌ كه‌ چاوه‌ڕوانی خه‌ڵاتی نۆبڵی ئاشتین، ئه‌و خه‌ڵاته‌ی به‌تێگه‌یشتنی سه‌له‌فییه‌كان خاوه‌نه‌كه‌ی ده‌وڵه‌تێكی كافره‌.

نادیه‌؛ ته‌نیا داوای ئه‌وه‌یه‌ خه‌ڵكی ئێزدی‌و ژنانی ئێزدی رزگاربكه‌ن له‌ ده‌ستی داعش. په‌یامی ئه‌و ئه‌وه‌یه‌ یارمه‌تی خه‌ڵكه‌كه‌ی بده‌ن، كچه‌كانیان رزگاربكه‌ن، تیرۆریسته‌كانیش له‌ناوببه‌ن.

 

 

سه‌رچاوه‌:

http://knwe.org/Direje.aspx?Jimare=40813&Cor=7&Besh=Araste

 

 
سه‌رچاوه‌:
http://knwe.org/Direje.aspx?Jimare=40813&Cor=7&Besh=Araste